الموضوع دا جالى فى البريد الخاص بية
وحبيت انى انقله ليكم ويارب تستفاده منه زى ما انا استفد منه كتير
واتمنى منك ردود
وياريت تكمله قرأته للأخر ومش تزهقه من كتر القراءة واليكم الموضوع : -
لما تشوف واحد قدامك .... راجل كبير مسن بيبكي ... مش بيصعب عليك ...
تخيل بقى لما بيكون بكاؤه ده لأنه بيدعي انه ربنا يغفر له ويسامحه ... مش بيصعب عليك اكتر ..
يانهاري بقى ... لما تشوفه كمان بيشحتف من البكاء .... اظن ساعتها هتجري عليه وتقوله هون عليك اكيد رحمك ...
اكيد هيغفرلك ... اكيد ...
شوف سبحان الله .. اما الرحمه دي كلها في قلبك وانت عبده .. امال رب العباد .... الرحمه عنده هتكون ازاي .... هو اكيد
اكيد قبل توبته وغفرله ... لأن رحمة الله اكبر بكتير قوي قوي من الرحمة اللي في قلبك ...
تخيل بقى ...
لو واحد غلط فيك قوي ... وظلمك قوي قوي ... واهانك قوي قوي ...لا ومش بس اهانك بينه وبينك ... ده اهانك قدام
الناس ... ويعني مش مره واحده اكتر من مره ... وعايش حياتك كلها ... كل ماتفتكره ... او تفتكر موقف من مواقفه ..
تتنهد بكل عذاب والم .. وعينك تدمع ... من كتر الالم اللي انت حاسس بيه ... وتقول حسبي الله ونعم الوكيل ...
وتهز راسك باسى شديد .. وتقول مش قادر ... مش قادر ... مش قادر انسى ... حسبي الله ونعم الوكيل
وفي مره من المرات سمعت كلمه عن العفو .... فحبيت تدوس على نفسك وتجاهدها ... وعمال تقنع فيها .. يانفسي اعفي
... اعفي عشان ربنا يعفو عنك .... برضه مش قادر .... اصل اللي عمله فيك مش سهل ابدا ... مش سهل ....
وفي يوم من الايام .... بليل وانت قاعد في بيتك .... رن الجرس ...
فتحت الباب .... لاقيته هو ... هو اللي ظالمك ... ايوه هو ... الدم جري في عروقك ونفسك تصرخ في وشه او ترزع الباب
في وشه جامد ... لكن فجأه ... تلاقيه بيقولك ... سلامو عليكو بهدوء ...
تتمالك اعصابك ... وانت بتقوله بكل غيظ ... وعليكم السلام ...( وحتى مش عايز تكملها من كتر غيظك )
وتقف بتبصله شذرا ... تلاقيه بيقولك ... ممكن اكلم معاك في كلمه...
اتفضل .... ( بكل نرفزه وباستعجاب من انك بترد عليه حتى... ومتمالك اعصابك لغاية دلوقتي )
طب مش هينفع هنا على الباب ..
اتفضل ادخل ....
دخل ... لكن كان في ناس عندك في بيتك ....
طب ممكن بس نكلم لوحدنا ....
مااحنا لوحدنا اهو ...
لا معلش انا مش عايز حد يسمعنا بعد اذنك ...
طب حاضر وروحت قافل باب الصالون .... ( كل ده بتعمله بغضب ... بدهشه من نفسك انك عمال تنفذله في اوامره اللي
عمال يطلبها ...و بفضول من... ياترى عايز ايه تاني ..)
اتنهدت تنهيده كبيره ... وقولت اتفضل عايز تقول ايه ...
وكانت المفاجاه ....
اخينا بدأ يبكي بكاء هيسيري .... وبيقولك سامحني .... انا غلط في حقك كتير ... انا ظلمتك ... انا اهنتك ... انا اسف ....
سامحني ....
طبعا حضرتك في غايه الدهشه ... والانفعال والغضب ... بتبصله وهو في الحاله دي وجواك شعور غريب جدا .... فرحه ان
ربنا اخدلك حقك منه ... حس بغلطه وجي يعتذر ... وفي نفس الوقت عمال يمر قدام عينيك كل المواقف اللي عملها فيك
واحده ورا التانيه ...مش عارف تاخد قرار انك تسامحه لانه صعب على نفسك قوي .... كل اللي نزل عليك هو السكوت مع
حته كبرياء او قساوة قلب في الحظه دي ..
اخينا لسه بيبكي ... بصلك مش شايف منك رده فعل .... نزل على ركبته وجالك بيقولك سامحني ... انا والله اسف .... انا
بعتذرلك ... عارف انك طيب وشهم ... وهتسامحني ... انا جاي وانا عشمان فيك انك هتسامحني ... هتمشني من عندك
مكسور بخاطري ... انا والله كان نفسي اعتذرلك قدام كل الناس ... بس ماقدرتش ... وفي نفس الوقت مش قادر استنى
اكتر من كده .... انا جتلك بيتك وبترجاك تسامحني ...
حضرتك بقى مش قادر في موجه غضب جواك ... من كل اللي عمله ...
هزيت راسك وقولتله ... معلش مش هاقدر اسامحك .... اللي انت عاملته مش سهل ...
طب ايه اللي يرضيك ....
مافيش ...
طب اعملك ايه عشان تسامحني ...
معرفش ... وفي نفس الوقت قمت وفتحتله باب الصالون
الراجل بص في الارض ... وقام على رجله وقال الظاهر ان مافيش فايده .... يارب سامحني ..
وهو خارج من الباب .... بصلك بصه كلها ندم .... واسى وقبل مايخرج من باب الشقه سمعته بيقولك سامحني انا اسف ...
وخرج
قفلت باب الشقه وانت في عالم تاني ... يمكن لسه زعلان وغضبان ... روحت نمت ..
وتاني يوم ... من الصبح التليقون رن .... رديت لاقيته هو بيقولك ... ازيك عامل ايه .. الحمد لله
قالك هاه ... لسه زعلان ... اتنهدت ... وقولتله ماانا قولتلك ...
ياه كنت بحسبك اطيب من كده .... طب اعمل ايه طيب ...
وصوته اتغير ... وبدأ يبكي ... ويقول والله انا عارف اني انسان ظالم ووحش ... بس والله انا تبت .. انا اتغيرت ... انا
اسف... انا اسف .... سامحني ....
لاقيت دمعتك نزلت على خدك .... وانت بتقوله ... خلاص سامحتك وعفا الله عما سلف ...
والله بجد .... صافي يالبن ...
ان شاء الله ... قعد يشكرك كتير ... وانت بترد العفو وقولت السلام وقفلت السماعه ..
لكن مافيش ساعه .... ولا قيت الباب بيخبط تاني ... واول مافتحت الباب ... لاقيت اللي بيحضنك ويقولك انا كنت عارف ....
سامحني والله .. حقك عليا ..
لاقيتك بتبكي وبتقوله خلاص والله مافيش حاجه حصلت ... ربنا يسامحنا ويعفو عنا جميعا ..
ياااااااااااااااه............تخيل بتقول ايه .... مافيش حاجه حصلت .... بالرغم من كل اللي حصل ده .... وسنين وايام وليالي
تفتكر ظلمه واذاه ليك ... وبتقول مافيش حاجه حصلت ... تخيل في لحظه مسحت كل اللي فات باستيكه ...
ورجعت الصفحه بيضاء ...
ولله المثل الاعلى ..... عملت ده كله وعفيت وانت عبد من عبيده .... امال رب العباد عفوه عامل ازاي ..
اكيد بيعفو وبيستر عنك .... لأن عفوه وستره ... اكبر بكتير بكتير من عفوك وسترك
سبحانه وتعالى الرحيم ... العفو ... الستار ...
هاه .. لسه ... لسه قلبك قاسي ....
لسه قلبك ماتحركش... لسه بتقول ... ولسه بتقولي ... اصل انا ذنوبي كتير قوي ... اصل انا لو روحتله مش هيقبلني ... مش
هيرحمني ... مش هيعفو عني ويسترني .............!!!
حــــــــــــــاشا لله ....
انا عارفه ان الدنيا خدتنا كتير قوي قوي ..... وبعدنا كتير ....
طب مستنين ايه عشان نرجعله ......... مستنين رمضان ...
لا ... لا... لا... احنا نروحله من دلوقتي .... ونسبق الناس كلها ...
ونجعل شعارنا .... ( وعجلت إليك ربي لترضى )...
لعله يرضى .... وبإذن الله يرضى ... ويرحم ... ويعفو .... ويستر ...
09-06-2007, 03:46 PM
ولله المثل الاعلى
المواضيع المتشابهه
العرض العادي
