معلش يا جماعة أنا أتأخرت عليكم معلش مذاكرة وكدة..لكن ع العموم أنا بعد وقت كبير وسط الكتب والمذاكرة الكتير مخي نضف..وأتغيًر وأكتشفت إن في حاجات كتير كنا فاهمنها غلط..فقلت ألحقكم بدل ما تفضلوا فاهمين غلط..لأن اللي ملهوش ماضى ملهوش حاضر
وحرصا منى على اثراء الحياه الفكريه والملوخيه اللى بالارانب لكل زائر وكل زائره تعالوا نراجع مع بعض التاريخ وبالمره أصحح لكم الاخطاء المطبعيه اللي درسناها في الابتدائية
أولا:العصر الحجرى
والعصر الحجري واخد اسمه من منطقه كانت مليانه ديناصورات زمااااان اسمها حجر النواتيه ولازال حتى يومنا هذا المكان موجود ….ولوسألت أي واحد عن اكتشاف النار اللي تم فالعصر الحجري؟؟..هيرد ويقول أن فى يوم من الأيام النور قطع وواحد من الناس بتوع العصر الحجري كان عاوز يولع شمعة لحد م النور ييجي راح ماسك زلطين ومطأشهم فى بعض زي العبيط راحوا مطلعين شراره (بيشتغلونا هوه يعقل أنه كان فيه شرارة في العصر الحجري؟؟) ومن هنا اكتشفوا النار...وعشان الكلام ده كانوا بيضحكوا بيكوا عليه اقصد بيضحكوا عليكو بيه تعالوا نرجع للمراجع الحديثة ..المراجع بتقول أن اقدم جمعاوي في شجرة العائلة كان قاعد في محل كشري (في العصر الحجري) حتى كمان كان رابط الديناصور بتاعه بره.. وعشان الطفاسه راح مغرق الكشري بالشطة وبعد أول معلقة راح واخد نفس من منخيره وسد ودانه وراح مطلع نار من بقه ومن هنا كان اكتشاف النار..مش زلط واسمنت وكلام فاضى……..
ثانيا:العصر الفرعونى
من الحاجات الغلط اللى موجوده ف كتاب التاريخ بتاع ابتدائى ان الملك مينا هو اللى وحد القطرين …الحقيقه اللى شوفتها فى المتحف الحربى بتقول غير كده المخطوطات الفرعونيه بتقول ان جمعاوى السابع عشر هو موحد القطرين:جمع المصريين القدماء من وجه قبلى ومن وجه بحرى وقعد معاهم قعدة عرب فى كافيتيريا فى ميدان رمسيس جنب شارع الهرم (كان مكان الهرم أرض فضاء للبيع)
وطلبوا من الساقى أقداح من ماااااء الشعير (فيروز حاليا)
جمعاوى السابع عشر: بصوا ياجدعان حاجه من الاتنين ….ينقسم البلد وكل واحد ياخد نصيبه أو نعمل قرعه واللى يكسب يختار الارض
مندوب وجه قبلى: يابو عموه اد لوحدها متسجفش
مندوب وجه بحرى:وكمان القله أم ودنين لازم يشلوها اتنين
جمعاوى السابع عشر: خلاص يبقى نتوحد كلنا يله نقرا الفاتحه
كده نكون خلصنا الحصه الاولى ويارب تكونوا استفدتم وآلهي لوكنت بكدب وبحور عليكم الجهاز بتاعكم يهنج!!!
***************************************
06-23-2007, 06:54 PM
درس خصوصي جدا
المواضيع المتشابهه
العرض العادي
