ماعقبكم ياناعس الطرف مجلاس
بالديره اللي كن اهلها غرايم
عقبك حياتي ضايعه مالها ساس
دايم وانا ببحور الاحزان عايم
غديت عقبك كن ماني مع الناس
مثل الغريب اللي يشوف الهضايم
يروح ليلي ماتهنّيت بنعاس
اقضيه لاصاحي ولاني بنايم
والله لو مالي سوى وقت الادماس
والضيقه اللي تكتم الصدر دايم
ماوالله ابقى للقراده والاتعاس
واصبر على ضيم الدهر صبر صايم
اخاف يقتلني عقب فقدك الياس
وانا على رجواك مابي عزايم
يامنوة المشتاق ياعطر الانفاس
ياملتجي الخفاق عن كل ضايم
جيتك ترى ماهمني بعد وارماس
ولا ردّني عن جيتك لوم لايم
انت الغنيمه والتفرّط بك افلاس
وان جيت ابا اغنم فانت ( راس الغنايم )


( عبدالرزاق الهذيل )