بصراحة من فترة نفسي أكتب الرسالة دي بس كنت بعالج مرارتى من الإنفقاع عقبال السامعين..لما يعالجوا مرارتهم مش قصدي لما تتفقع هتقولولي يا مواطن وإيه اللي فقع مرارتك؟؟ هقولكم طبعاً وأنا أقدر أخبي عنكم حاجة..

خير اللهم أجعله خير..قال إيه كنت راكب فى الترام ولقيت جنبي واحد بيقرا فى جرنال فعملت عبيط وقعدت أقرا بنص عين الأخبار المكتوبة وقال إيه ألاقي في الصفحة الأولى فى الجريدة الرسمية الأولى خبر بيقول :
مظاهرة تقيمها فتيات الطبقة الراقية

قلت أكيد عايزين يعملوا مظاهرة عشان إحساسهم بإن النبي صلى الله عليه وسلم إتهان..ولا عشان الناس اللي فوق تتلحلح شوية وتشوف حل لقضية القدس

اللي حمضت من الإنتظار فى الملفات ولا حتى تشوف حل لمطالب الشوارع والغلابة ولا الغلاء ..ولا فاتورة التليفون الجديدة ولا يمكن لتحرير العراق المغتصب أرضه ونسائه ..قلت وأنا محيّر نفسي ليه؟؟ يا خبر بفلوس كمان سطرين يبقى ببلاش ..ورحت ضارب بعيني في السطر الأولاني فى الخبر أقرا بقى وقلبى فرحان إن تحرير المرأة جاب فايدة ولكن فوجئت إني مواطن مش عايش في الدنيا وإني متأخر تلاتة مليون سنة على الأقل عن الأحداث الجارية, الخبر بيقول إيه:

فتيات الطبقة الراقية فى مصر عاملين المظاهرة بالعربيات بتاعتهم ورافضين أي واحدة تروح من غير عربية

قلت وماله همّا برضه الطبقة الراقية مش معقول هيبقوا زينا ويمشوا على رجليهم

وكمان دول بنات يعنى السترة ليهم أفضل جوة العربية عشان الطوب والدبش وأي خناقة فى المظاهرة برضه دول زي إخواتنا وأهو يبقى الموضوع منظم ودي صورة مصر قدام العالم فلازم نبقى عالم شيك أفهموها بقى ..ولسه بكمّل بقية الخبر لقيتهم كاتبين :
على كل فتاة تشترك فى المظاهرة انها تجيب اتنين بوستر للنجمين

قلت نجمين إيه؟ يكونش مصر بقى فيها وكالة فضاء زي ناسا بتاعة ماما أمريكا

قعدت أضرب أخماس فى أسداس وقلت أكيد الموضوع ليه علاقة بخسوف الشمس اللي حصلواللى احتفلوا بيه بإنهم جابوا رقاصة ترقص فى مرسى مطروح وقت الكسوف بس الصراحة مش عارف إيه علاقة الهشك بشك بالكسوف الشمسى
المهم رخمت على الراجل صاحب الجرنال وركزت بعينى فى الصفحة عشان أفهم ليه المظاهرة تتوقعوا بقى لييييييييييييييييييه المظاهرة ؟؟

أقولكم ولكن خلوا بالكم ..قسم المرارة المفقوعة مليان على الآخر بالشعب المصري وبعض والشعوب المجاورة فكل واحد يحافظ على مرارته تصوروا السبب الرهيب
فتيات الطبقة الراقية تقيم مظاهرة بالسيارات أمام القسم المحجوز فيه المطرب الشاب تامر حسنى والمطرب هيثم شاكربعد أن ثبت أن أحدهم زور شهاداته الرسمية والآخر هارب من التجنيد ومزور الشهادة ويشترط لحضورالمظاهرة أن تاتى الفتاة بالسيارة ..وأن تلصق بوسترين للنجمين على الزجاج الخلفى للسيارة وأي فتاة لن تفعل هذة الشروط لن يعتبروها متظاهرة معهم

انتهى الخبر







آآه والله العظيم مش بهرج ولا بكدب مصر أم الدنيا يا نااااااااس كفاياكم رجعية وتخلف إن مكانش هيتظاهروا عشان تامر حسني هيتظاهروا عشان مين وعشان إيه ؟
يتحرقوا بجاز عشرين ألف معتقل سياسي في مصر من غير سبب ..الله يخرب بيوتكم ..نفسي أفهم إيه اللي هيحصل فى المظاهرة دي ؟

هيرعبوا قوات الشرطة بالكلاكسات ويعملوا بيب بيب ؟؟؟

وهتافات ياى ياى تامر ياى ياى هيثم هيا دي المظاهرات ؟؟؟

اتنين هربانين م الجيش ومزورين ورق رسمي يتعمل عليهم كدة ؟؟؟؟

هيا دى القضايا اللي شاغلة عقل بناتنا ؟؟؟؟؟

هيا دى البنات اللي مفروض هتطلع أمهات وتربي ولاد ؟؟؟؟؟؟؟؟؟؟
هيا دى البنات اللي المفروض نص المجتمع ؟؟؟؟؟؟؟؟؟

خلاص بقى تامر حسنى وهيثم الأبطال اللي يا حرام لازم نضحي عشانهم ونقف بالعربيات وراهم ؟؟؟؟؟؟؟؟؟

أنا متصور منظر قوات الشرطة المساكين وهما بيتحدفوا بالبسكويت اللي بيعور

وهتخرج وزارة الداخلية ببيان خطير يجرم ويمنع إستخدام البسكويت في المظاهرات اللي سبب إصابات بالغة خاصة من البسكويت اللي محشي عجوة كان يا مامي رهيب وفتاك

مع:تحيات جمعاوي

thanks

الله عليك ياعسللللللللللللللل

حلوووووووووووه

ده انتا الى عسل وشكرا على المرور

مشكوووووووووور يا بطل