الحالة ضنك كالمعتاد الأمتحانات خلتني مفلس كلمت ناس كتير علشان يلاقولي شغلانة استرزق منها وكان منهم وياريت ما كان السيد سوكا .
السيد سوكا بعيد عن حضراتكم نموذج للطالب اللي حب الجامعة والجامعة حبته عشق الجامعة وأخلص لها علشان كده بقاله فيها اتناشر سنة ، وكمان بقى يعني اثر فيها واثرت فيه يعني السيد سوكا احد أقدم موردي البانجو على مستوى الجامعة وتاريخه الأجرامي حافل و مشرف .
المهم وانا قاعد في بيتنا في امان الله بفكر اعمل ايه في التفليسة اللي انا ضاربها دي لقيت اللي بينده جااااامعااااوي ...طلعت لقيته السيد ..طبعا ما قلتلهوش اتفضل ده ممكن يدخل بيتنا يطلع في دماغه يستولى على البيت و يكرشني انا واهلي ويقعد هوه .بلطجي بمعنى الكلمة .
نزلتله قالي بقولك ايه يا جامعاوي عندنا سبوبة اكل عيش بكره تيجي معايا ...قلتله بس انت عارفني ياسيد انا ما ليش في السكة الغلط .
قالي تف من بقك يا راجل إحنا حنعمل عمل وطني جليل ..إحنا طالعين مظاهرة يا جامعاوي .
قلتله طيب ومال المظاهرات بالشغل . قالي بكرة تعرف
فضلت افكر هوا ايه علاقة المظاهرة دي بالشغل اللي انا بدور عليه ...أيوه اكيد السيد سوكا عنده نظرة مبعدية على رأي اللمبي وعايزنا نتظاهر من اجل العمل ومواجهة البطالة ...مبعدي بجد السيد سوكا ده .
تاني يوم الصبح فات عليا السيد واخدني في الطريق فضل يقول لي كلام كتير ما فهمتش منه غير جملة واحدة أحنا هدفنا النهاردة كفاية ...وقلت في عقل بالي هوا من امتى السياسة بقت مسيطرة على سوكا كده لدرجة إنه ينضم لكفاية .
فضلنا ماشيين لغاية ما قالي بس يا جامعاوي أحنا كده وصلنا للمكان اللي حنتجمع منه.
يا ولاااااد الأيه يا بتوع كفاية رايحين تتجمعوا عند الحزب الوطني آه يا خبثا .
بس ما احكيلكش على اشكالهم طفرات فعلا ...يعني أول مرة مثلا الاقي واحد عنده حواجب تحت عنيه .ده واخد بشلتين تحت عنيه مخلينه بحواجب فوق وحواجب تحت .هي العالم دي جاية منين ؟!! هما دول ضحايا الأشعاع النووي ولا ايه .
المهم بدأت العملية تحمى وزعوا علينا اعلام بتاعة مصر وفهمونا أن دي اهم حاجة .
وبدأت الستات تزغرد وطلع فينا واحد فسل ومعاه مكريفون وبدأ يهتف ...حسني..حسني ..هووه هوووه .
إخس على كده ليه كده يا بتوع كفاية تشتموا ...بلاش الشتايم القبيحة طيب ..هي وصلت لهووو..هوووو .
وبعدين مرة واحدة قام السيد سوكا اداني كوع وقالي يلا يا بطل ..التانيين اهم ..بصيت لقيت ناس واقفين بيتظاهروا ..قلتله هما مين دول يا سوكا ..قالي بتوع كفاية .
قلتله امال احنا مين الله يخربيتك ؟؟ قالي احنا بتوع الوطني يا فالح ..قلتله طيب وبنشتم الريس ليه ...قالي لا يا غبي احا بنصيته .يلا يا جامعاوي بلاش لكاعة استعد بالعلم .
مسكت العلم وبدأت ارفرف بيه ..قالي بتعمل ايه بس يا ابو مخ تعبان ..استعد بالعلم يعني جهز العصاية بتاعة العلم علشان ننزل بيها على نافوخ بتوع كفاية .
يا نهار ابيض هوا فيه ضرب ...قالي امال بقولك سبوبة عيش ليه ..ده اليوم بعشرين جنيه ..يلا يا ابني اليوم يومك عشرين جنيه حتة واحدة .
وبدأت المعجنة البلطجية بتوع الوطني نزلوا تلطيش وضرب في الكام واحد بتوع كفاية لغاية ما هروهم ضرب فضلت افكر اعمل ايه اعمل ايه ..قلت بس ما فيش إلا حل واحد ..وقمت وقفت وناديت بأعلى حسي كفاية كده عليهم دي مش أخلاق حزبنا الوطني يا جماعة حزب التنمية والأزدهار والتطور والفكر الجديد .
طرااااااخ ...ايد واحد نزلت على قفايا وقالي ما هوا ده الفكر الجديد .....انت جاي تتفلسف لنا هنا اعمل بالعشرين جنيه بتوعك .
بدأت احاول اخلع من المطحنة دي بلاها دي عشرين جنيه لكن فجأة لقيت واحد من بتوع كفاية اتعلق في دراعي وعمال ينادي ...: أهو واحد من الحثالة أهو ..وانا اقوله يا عم ابعد عني ..سيبني في حالي ابوس في ايديك انا معاكم .
لقيت بتوع الوطني جايين علينا من بعيد وقاموا مسكوه طحنوه في وسطهم وبعدين ...طرااااخ واحد منهم ( بتوع الوطني ) نزل على قفايا ..فيه أيه ياعم ..لقيته بيقول انت بتتفرج عليه وهوا بيشدك أديله على نافوخ أهله .
شوية والجزيرة جت تصور ...قلت بس المفروض بتوع الوطني يلموا نفسهم علشان التليفزيون لقيتهم جمعونا وقالوا عايزين نضرب بتوع الجزيرة ونزلوا طحن في بتوع الجزيرة ...الراجل بتاع الجزيرة خاف على الكاميرا وفضل يصرخ .. الكاميرا عهدة يا ولاد الـ(....) بمية ألف جنيه الكاميرا يا ولاد الـ(....) المشكلة إنه ما كنش شايف من ولاد الـ(.....) غيري أنا وبس وبقيت أنا كل ولاد الـ (....) وكلت الضرب كله .وبرده طرااااااخ ...انت سايبه يضربك اديله على نافوخه .
خلص اليوم واتبهدلت آخر بهدلة ...لقيت السيد سوكا جاي ليا وهو بيقولي خد يا جامعاوي نصيبك أهو ولقيته بيديلي 12 جنيه...قلتله مش انتم كنتم بتقولوا 20 جنيه ...قالي لا ماهو فيه الريس دبور اللي جايبنا بياخد اربعة جنيه ...وانا خدت منك اربعة جنيه علشان جبتك يبقى حسابك اتناشر جنيه .
قلتله لا يا عم حلال عليك الأتناشر جنيه ...حد الله بيني وبينهم...قالي إيه يا جامعاوي انت مستحرمهم ولا أيه ؟؟
قلتله لا يا عم ...بس سمير رجب قال إن بتوع كفاية بياخدوا 150 دولار في المظاهرة ...انا اروح أحسن لبتوع كفاية .
04-20-2007, 09:57 AM
حسني حسني ..أوه..أوه
المواضيع المتشابهه
العرض العادي
