مرة في ساعة صفا وأنا قاعد قدام المرايا بصيت لنفسي قوي وسألتها-نفسي يعني-السؤال ده..هل أنا-جمعاوي يعني-عندي الشجاعة اللي تخليني أتراجع عن قرار مصيري أخدته في حياتي حتى لو كان ترجعي ده مرفوض منطقياً وبطيخياً من كل اللي حوليا؟؟ ولا أنا بتعامل مع أي قرار باخده بمنطق لعبة الشطرنج"تاتش مووف"..اللي تحركه ماينفعش ترجعه..يعني مثلاً..مثلاً..ينفع أتراجع عن قراري في إختيار الكلية اللي أنا دخلتها..صحيح هي الكلية مش وحشة قوي..وصحيح إن الكليات التانية مش هيا الأملة..وما أصخم من سيدي إلا سيتي..وقال خش الزريبة نقيلك كلب قال كلهم كلاب ولاد كلاب..
لكن ليه لأ؟؟..ليه ماكنش مرة في حياتي جرئ مع نفسي وأعترف بخطأي في أختياري؟؟..ليه ما كنش راجل وأقف وقفة رجالة؟؟..أيوة وقفة رجالة مع خلايا عقلي الباطن؟؟..اللي شايلة وكاتمة-خلايا عقلي الباطن يعني-في قلبها أحلامي؟؟..وأقف معاها ضد سيطرة خلايا عقلي الظاهر الديكتاتورة واللي حاكمة خلايا عقلي الباطن بقالها أكتر من 20 سنة بنفس الطريقة القمعية البوليسية وحرماها من إنها تثور على الواقع-أنا بتكلم على عقلى طبعاً عشان محدش يفهم غلط-.
لكن في النهاية كل مرة بارجع وأخاف وأستسلم لعقلي الظاهر وكلام الناس..بس النهاردة خلاص أنا قررت أعمل إنقلاب في حياتي.
دخل أوضتي وقفلت على روحي وفكيت صواميل مخي حتة حتة..مسكت خلايا مخي الظاهر ورحت مقشر قشرته المخية..وبعدين خليت المخيخ فوق والفص اليمين نقلته في الشمال والفص الشمال نقلته في اليمين ووصلت التوصيلات كلها غلط..وبعدين غطيت مخي وربطت الصواميل..وبعدين شغلت power ..لقيت دماغي سخنت..ووشي أحمر..ووداني بطلّع دخان..ولقيت نفسي طالع لأبويا في الصالة نافخ صدري ومطخن صوتي ومبرق عيني..وبزعق بعلو حسيّ وأقول:..بابا..أنا جمعاوي..أخدت قرار مهم لازم تعرفه..أنا حسيب الكلية وأروح كلية تانية..!!
...تاتش مووف..
فتحت عيني لقيت نفسي في مكان أبيض ف أبيض..وخير اللهم اجعله خير ناس لابسه أبيض ف أبيض..وبيدوا حقن..ولقيت واحد مقرب مني بواحدة-حقنة يعني-فصرخت..لأ..لأ..أنت مش بابا أنت مين؟؟..أنا فين؟؟..إيه ده أنا جسمي متجبس كده ليه؟؟..أنا عايز أروح..فين بابا؟؟
لقيت بابا نايم في السرير اللي جنبي..وقالولي إنه جاتله ذبحة صدرية-معرفش يعني إيه؟؟..بس قالوا إن السبب هو الكلام اللي قولته لبابا..صحيح هو طحني بعلقة جامدة وإيده كانت طارشة..بس ده برضه أبويا يعني في مقام خالي..
يلا..نهايته..ألعبوا يا جماعة..بس خلّوا بالكم..تاتش موووف
04-20-2007, 09:53 AM
تاتش مووف
المواضيع المتشابهه
العرض العادي
