المطرب المشهور جمعاوى الحنجور

جمعاوى طلعله عفريت من القله وقاله ليك طلبين ,اتحقق الاول وناقص التانى00 ياترى هيطلب ايه!


جمعاوى: شوف ياعفريت انا 00 امنية حياتى من زمااان أنى أغنى أنا صحيح صوتى بيخروش وحنجرتى شبه السفون البايظ لكن العبرة ف الزمن ده مبقتش بالصوت
العفريت أمرك مجاب اناهنزلك حالآ فالسوق خمس شرايط
جمعاوى:خمس شرايط مره واحده 00ليه هتنزلى شرايط برشام!
العفريت:ولسه00أناهخليك تطلع ف ليالى التلفزيون وليالى الراديو وليالى الشتاء القارس00هتغمض عين وتفتح عين هتلاقى نفسك اشهر مطرب ف مصر ولبيا والدول الصديكه (ياشمهورش خليه فنان من غير كليب عريان ولاكلام تعبان)0000
* (ومرت الايام .. وداس جمعاوى على كل المبادئ بعد ما بقى فنان)
المذيعة : سيداتى ساداتى معانا النهارده فارس من فرسان الأغنيه الشبابية حاجة كده فرز أول المطرب العاتفى المشهور جمعاوى الحنجور فى البدايه نحب نقول لك مبروك على الألبوم الجديد الى مكسر الدنيا
جمعاوى : شكرا ياغالية يا بنت الغاليين يا اصيله يا بنت الأصليين
المذيعه : عاوزين نسمع حته منه فى بداية حوارنا
جمعاوى :

ياحبيبى حرام كفاية ........ضحكتك برشام دوايه
لما مره زعلت منى.........كف ايدك شال قفايا

المذيعة: برافو برافو ايه الحلاوه دى مفيش جبنه??? طب ياترى تحب ترد ع الناس اللى بيقولو ان الشرايط بتعتك فيها اسفاف؟
جمعاوى: اسفاااااف انا معنديش شريط بيسف .. أناهقول للناس دى أتأكدوا أكيد العيب ف التسجيل
المذيعه:لأ أنا أقصدانها لا أخلاقيه
جمعاوى:لأ لأ كله الا كده أنا راجل عندى أخلاق وتين .. أنا بحج مرتين ف السنه مره ف الصيف ومره ف الشتا
وصليت الجمعه الى فاتت كمان
ومكنتش عاوز اتكلم بس مضطر .. انا اتبرعت بمليون جنيه من يومين لاعمال الخير
المذيعه:اعمال الخير؟
جمعاوى:انا أتبرعت لمدرسه الرقص الشرقى عشان العلم نور
المذيعه : طب ياترى مين الاسماء الى كانت ورا نجاحك؟
جمعاوى هما اسمين بس اسم المنتزه واسم الرمل
المذيعه : وايه اخبار ألبومك اللى جاى
جمعاوى: ألبونى اللى جاى غنيت فيه للوطن وقلت ...مصر هيه أمى طنطا هيه خالتى
وغنيت عاتفى...اللى يرن عليك ياقلبى كل يوم كنسل عليه
وغنيت عن التعاون ...ياحبيبى فلينى فلى دأنتا حبك انتاج محلى
المذيعه:ومعانا دلوقتى اتصال تليفونى
العفريت:ألو يامذيعه ممكن اكلم جمعاوى؟
المذيعه : اتفضل بس قول اسمك الاول
العفريت:اسألوه وهوه يجاوب أنااللى كنت فاكر أنه لما هياخد الصوت الجميل هيستخدمه صح
جمعاوى:اهده بس حضرتك احنا ع الهوا بلاش فضايح
العفريت:ياشمهورش ياشمهورش حبشتكان حبشتكان ارجع ياجمعاوى زى زمااااااااان