السلام عليكم ورحمة الله وبركاته
الصلاة والسلام على أشرف الأنبياء والمرسلين سيدنا محمد وعلى آله وصحبه أجمعين
أما بعد :
في هذه الزاويه من منتدى القصص والروايات
سنطرح جميع القصص التي تحتوي على قصائد شعريه وذلك للحفاظ على تراث اجدادنا
والإستفاده من تجاربهم وحكاياتهم ...
في هذا الركن سنسعى جاهدين لجمع أكبر عدد ممكن من القصص المشتمله على قصائد
ليسهل للجميع الإطلاع عليها ومشاهدتها عند الحاجه ...
أتمنى من الجميع المساهمه في هذا الموضوع ....
ولكم مني أطيب تحيه ...
....,.,..,.,,,,,,,,,,,,..............,.,.,.,.,.,., .,.,.,.,.,.,.,.,.,,.................,,,,,,,,,,,,,. ,.,.,.,.,.,.,,.,
جرت أحداث هذه القصيده في حدود عام 1230هـ أو 1240 هـ
في مره من المرات جو مجموعة من الحريم ثلالث حريم ومعهن هاك البنت بنت جميلة تبي تتزوج أخر الاسبوع
أو عقب شهر المهم جايين يتقضون لها ويأخذون لها مقاضي عرس وإلا فعلاَ بنت جميله جايبينها من البر متعافيه بالحيل يعني عمرها أقل من العشرين لكن ما شاء الله عليها جسم وصحه وفيها حياء ودلال وهماها لا صارت معهم وهي داريه عن روحها أنها بتزوج يغلب عليها الحياء, ودائماَ تطمن عينها كل ما عرضوا عليها سلعه يبون يشترونها لها حتى ولو أنه ما هوب في خاطرها تقول ايه وتسكت وتأخذها المهم يالربع جو مجموعة هالنسوان يدورون في السوق يأخذون منه الديرم والحنا والكحل واللبان ومااللبان والطيب والعود والجاوني والبخور هذي تباع في مكان الحالها ومشط خشب يشترون لها مشط الخشب عشان تكد رأسها
المهم جو يتقضون وقعدوا عند راعي ذاك الدكان يوريهم شوفي ياخاله هذا يسمونه كذا وهذا كذا , الحاصل قام يعرض عليهم وهن قاعدات الحريم واحده منا وواحده منا وهي بالطرف يورونها شوفي يابنتي هالقماش تراه زين ويفلٌه لهم راعي الدكان ويوريهم اياه ويقول شوفوا هذا وهالنوع من القماش وهذا ديرم ويكذب لإنه عندهم مثل راعين البيع والدكاكين يقولون الكذب مسامير السلع , ويدرجها حتى لوانها ماهيب شي فيقول لهم هذا توه جاي من الهند وهالديرم صبغته طقتين ويغدي البرطم ادعم والكحل ذا مشيت منه والعين تغدي تهبل ويمدح وبعض أهل الدكاكين الله يجيركم لو يمدح عجوز أعرست .
الحاصل أنه يوصف لهم ويوريهم والبنت قاعده بالطرف وهالبنت ماهيب لعب عينها من ورا البرقع وهدبها يمشي عليه الجربوع ما شاء الله وصحه ومتعافيه وإلا يوم حيرت الناس كل اللي يمرون منا مع السوق سوق الحسا تخبرون عامر وكل من مر وشاف هالبنت قام يتمرمر من عند هالدكان , وصارو ياقفون اللي معه سبحه واللي يناظر واللي يسوي نفسه يكلم واحد من ربعه ويقول وقف أعلمك تقدمو شوي وعلمه قال لا دقيقه أخاف أنسي الهرجه وصار يردد الحكي عليه كيف الحال طيب كله بس يبي يناظر وإلا ما عنده سالفه وإلا فعلاَ جمال وتلفت الانتباه حتى قعدتها ووقفتها ومشيتها غير , هبلت هالناس الحاصل صار على راعي الدكان ضول ظلوا عنده الناس وصار كل من جاء قام يتهايق , وفيه راعي دكيكين متشطر هناك في جنوبي السوق وراعي هالدكان هذا ابن حلال أجودي معه مهفه وقاعد في عاير هالدكان وماعنده بضاعه يجون عنده ربعه يسولفون عليه لكنه شاعر بليغ الحاصل شافوا اللي في الدكاكين هناك الظول من بعيد ولا يدرون وشو وكل من جاء مار مقبل سأله قال وش هالظول اللي هناك قال ابد والله ما أدري وشي أحد يعمله وأحد ما يعلمه المهم كل من سأله عن هالظول اللي هناك وشو قال ماأدري والله , وآخر شي قالوا رح ناظر تشوف انت بنفسك وهو يصك دكانه ويحط غترته وراء وجاء يمشي ويوم أقبل وشاف الظول وفعلاَ ظول ويوقف ويطالع و يوم شافها وإلا شوفتها تهبل وأخذ روحه وراح وقال هالقصيده التاليه ...
أسباب ما هيـظ ضميـري وهاجـه
صبح الثلاثاء والخلايـق يدوجـون
مريت ظبي يشتـري لـه حواجـه
عليـه نـاس واقفيـن يظـولـون
نشدت وش هالظول قالـوا تواجـه
وايق تشوف بعينك اللـي يشوفـون
أن كان مالك في هوى البيض حاجه
اقضب طريقك خل فاتـن ومفتـون
بغيت أسير وصرت قضـاي حاجـه
نفـس توازينـي مواثيـم وغبـون
وجدك على مـال تنوشـه سماجـه
ما يشتهي الفتنه فتى كود مجنـون
قمت أتهايـق لإن مثـل السراجـه
ظبي حجاجه بأحمر الموت مقـرون
يبرم عليهم فـي طبوعـه غناجـه
يحيون من غنجه ومر(ن) يموتـون
يغضـي إلا قـذوه ريـم الفجاجـه
وإن قذهم بملجلج العيـن يغضـون
حكيه قروضات تقـل فـي حجاجـه
قـوس يجـر وقينتـيـن يغـنـون
قوسة جبينه والوتـر فـي حجاجـه
وعيونه اللـي بالمقاديـر يرمـون
لو أن هدب عينه شجر في زراجـه
شفت الجوازي في ظلالـه يقيلـون
مابه من المنقـود كبـر الحلاجـه
إلا عيونـه لاسـطـو مايعيـقـون
بيـن اعتدالـه لامشـي وانعواجـه
غصن يميـل وخيمتيـن يشيلـون
قلب جرحته تبتصـر فـي علاجـه
ياكود من طيبك جروحـه يطيبـون
وش ذا التمخطر والتعب والدواجـه
تجوز منها فالبـدو عيشهـم هـون
تلبس ملابيـس البهـاء والبهاجـه
وعن الوسخ ماتغسـل إلا بصابـون
وتشرب من الماء بارد في زجاجـه
في روشى عن واهج القيظ مصيون
أو ما وهو يضحك وطـرب مزاجـه
ياهيه وين اذنينك اللـي يسمعـون
حلفت لو اعطي الحساء مع خراجـه
على بيبان الحضـر مـا يصكـون
عندي أحب من القرع مـع دجاجـه
هيـم مجاهيـم بالاقفـار يرعـون
واحب من لبـس العبـي والعلاجـه
شاوية شقراَ بها الشـوك مدفـون
عـن الحلـو عـد كثيـر هماجـه
اكرع برأسي فيه من غير ماعـون
ومن البـدو علـج يـدرج نعاجـه
ولا سحاقي من الـورس مدهـون
كـل يناظـر عينتـه فـي زواجـه
ترا البدو ماهمب للحضـر يبغـون
واقفت سوات السيد عجـل عجاجـه
تقول أثر حضران ورقـا يعشقـون
حيذور كـم يـا راكبيـن الحداجـه
عن الحضر من مكرهم لا تصـادون
ياليت مـن يضـون ليلـة زواجـه
يمشي على الاصابع من حيث ياعون
فالا وعوا بي قلت قضـاي حاجـه
وقالوا من انت قلت أنا دور ماعون
قلت المواجه قال ما مـن مواجـه
اصبر علينا ليـن اهلنـا يحـدرون
والا فهمت كم عنيتك مـن زناجـه
في شرعنا قتل العشاشيق مسنـون
يرجحون الرواة ان هالشاعر اسمه محمد بن مسلم من ابرز شعراء الحساء مات في عام 1280 هـ تقريباَ
.,..,..................,,,,,,,,,,,,,,,,,,,,,,,,.,, ,,,,,,,,,...................,.,.,..,..,..,..,..,.. ,..,..,.,..,..,.,.
وهذي القصه الثانيه....
قصة وقصيدة عواء الذيب
هذه الحكاية مجهولة الأبطال , وذلك نظراً لمضي وقت طويل عليها أو لأن
أبطالها ليسوا من المشهورين كالأمراء والفرسان والذين يحرص على أسمائهم
قبل حكايتهم . . . يقول الراوي
كان هناك رجل بالبادية متزوج من امرأة ليست من قبيلته , بل كان من قيبله
أخرى مجاورة لقبيلته . . . ومرت عليه فترة سنه هو وزوجته يعيشان بأحسن حال . . . وقد اختلفت القبيلتان وحصل بينهما نزاع وكان زوجها طرفاً فيه . . .
وكان اخوتها من الجهة المقابلة أطرافاً بهذا النزاع واشتدت الأزمة بين طرفي النزاع مما حدا بإخوان الزوجة أن يأخذوها ليلاً من بيت زوجها نكالاً له . . . وهي لم تكن راضية بفراقها لزوجها وكذلك زوجها الذي كان يحبها حباً كبيراً أيضاً . . .
ومرت فترة طويلة بعض الشيء على فراق الزوجين والكل منهم كان يريد الآخر ولكن النزاع الحاصل حال بينهما
ضاقت الأرض بالزوج , فهو يريد زوجته ولا سبيل لوصوله إليها , ففكر بطريقة . . . أن أسل إليها إحدى عجائز القبيلة تبلغها برغبته بلقائها . . . ورسم لها خطه للقاء . . . وبالفعل ذهبت العجوز للزوجة وأبلغتها بذلك فرحبت الزوجة بالفكرة
ولما كانت الليلة الموعودة حيث كان الوعد بينهما بعد غياب القمر جاء الزوج للمكان المتفق عليه وكمن بحيث لا يراه أحد . . . ثم أخذ بالعواء كعواء الذيب ثلاث مرات متتابعة . . . عرفته الزوجة حيث كانت تعلم بالخطة سلفاً وذهبت إليه وجلسا بعد طول الفراق يشكو كل منها حاله للآخر بعد الفراق حتى إذا ما جاء الفجر افترقا وعاد كل منهما لقبيلته
مضى على هذا اللقاء فترة أشهر . . . ويقسم الله سبحانه أن تحمل المرأة من زوجها كنتيجة لذلك اللقاء . . . ويكبر بطنها فيراه أخوها ويهددها بالقتل فمن أين لها بهذا الحمل وقد فارقت وزجها منذ فترة طويلة ولم تكن حاملاً ؟؟؟
فأعلمت شقيقها بحقيقة ما حصل بينهما وبين زوجها ووصفت له المكان وأعلمته بكل ما جرى . . . فقال الأخ سأذهب أنا لزوجك وأتأكد من حقيقة ما حصل فإن لم يكن صحيحاً فليس لك عندي غير السيف
ولم تكن القبيلتان على وفاق فكيف يذهب . . . فكر الأخ واهتدى إلى طريقة . . . فلما جن الليل تنكر وذهب إلى قبيلة زوج أخته ودخل مجلسه وجلس ولم يعرفه أحد . . . ولما سكت المجلس تناول الربابة وأخذ يغني عليها
يا ذيب يللي تالي الليـل جريـت
ثلاث عوياتن قويـات وصـلاب
ادخل على لله بعدهن ويش سويت
يوم الثريا ثلجت و القمر غـاب
وغنى هذه الأبيات على الربابة ثم توقف ووضع الربابة مكانها وعاد إلى مكانه . . . فعرف الزوج أن هذا أخو زوجته وفهم أن زوجته حامل كعادة البدوي سرعة اللمح وشدة الذكاء . . . فتقدم وتناول الربابة وأجاب
أنا أشهد إني من قراكـم تعشيـت
وأخذت شاة البيت من تحت الاطناب
على النقا وإلا الردى ما تهقويـت
ردوا نسبنا يا عريبيـن الأنسـاب
فلما فرغ الزوج من أبياته فهم الأخ أن أخته كانت روايتها صحيحة وانسحب بدون كلام . . . وفي الصباح أعادوا له زوجته
وهذي القصه الثالث :.
&رثــاء زوجة غاليــــــة &
تعرفون من أول اذا بغى الواحد يتزوج ما كان يشوف المره ويطالعها أو يتحدث معها أحياناَ يتزوج ( على الله وبالله) ويخطبون له بنت فلان ويأخذها وبس هذا واحد من الشعراء الحقيقة تزوج مبطي لكن ماش ما توفق في زواجه الأول وكلن راح بستره – وراحت المره بستر وقعد يدورعلى مره ولقي البنت اللي تعجبه وإلا فعلاَ يوم أخذ هاك المرة ولا هي حرمه هاديه وحبيبه ودمثة الأخلاق ولطيفه وتراعي خاطره وتداري مشاعره ومشاعر أمه وكان يقول يوم تزوجتها كنت في بيت واحد أنا وأخوي ووالدتي وأخوي الصغير الثاني وتو أخوي اللي أكبر مني متزوج ويقول حنا في بيت واحد عائله واحده , ويقول هالمرة هاذي حبيتها حتى الوالده حبتها لإنها ذربة وظفره وتشتغل معهم وتساعدهم بالمطبخ ما هيب تقول هذا ما هوب علي وذا علي اليوم ( بلاها والله مهيب من بنات الحين كان تحلف مية يمين ما تطبه ) وتداري خاطر زوجها إذا جاء وتقهويه وتسولف معه وتشوف إن كان الرجال هاك اليوم وجهه سفر وحليل ولا عنده خلاف ما زحته وداعبته وضحكت معه وش تشتهي يا ابو فلان وش نجيب لك يا فلان (ابوووك يالرومانسيه ) وتريحه وتبعده عن الصجه واللجه وتخليه ينام الظهر مرتاح وإلا بغى يطلع تلاحظ ملابسه المهم إن هالمره من يوم أخذها وهو مرتاح معها إلين الله وسع عليه واشتغل وأخذ بيت له جنب بيت اهلها وقام يأثث البيت , المهم يقول انا مرتاح معها وتداري خاطري ولاتؤذيني بكثر الطلبات اللي أنا اجيبه فيه بركه كل ما جبت شي قالت الله يوسع عليك ويجزاك خير وعساك على غناة وكل شي تمام يقول أرد الله أن حنا عقب ما مضي تقريباَ حول سنه – المره حامل وعلى وشك إنها تضع يقول : تجمعوا ربع لي وأصدقاء وراح هو واياهم في رحله مقناص بعيدة ويقول معنا بعد واحد حنا في ضيافته واحد من الشخصيات راحوا معه كل هاللي رايحين إلى القنص مع واحد كبير مثل ما تقول من الأمراء , المهم رايحين بعيد معه ويقول رحنا وطولنا في رحلتنا هذه قعدنا فوق الشهر يقول رحنا في مكان كل اللي حولنا باديه وكل يوم لنا مكان يوم بين ظلعان ويوم في سهل ويوم رمال ويوم نتنقل , والسيارات توها في بدايتها ما كان عند الناس سيارات واجد يقول في رحلتنا هذه يوم جاء يوم من الأيام وإذا فيه واحد من خويانا في هالرحله يبي يروح للديرة قاموا وسألوه الربع اللي قاعدين يا فلان تبى تروح قال إيه لإنه موصيه الأمير يروح يجيب لهم أغراض قال زين تكفى الله لا يهينك تطق على أهلي وتعطيهم شوي هالفقع هذا قال الثاني من فضلك بعد تمر على والدتي وشف هالإقط هذا عطهم إياه . قال زين ويوصيه واحد يعطيهم شوي سمن وذاك طق على أهلي شف إن كان هم يبون شي أو يحتاجون شي عطهم فلوس وأنا لاجيت أعطيك يقول هو من ضمن اللي هم وصوا بعد – الشاعر هذا الشاعر اسمه ( جديع بن سودان العنزي ) يقول جديع قمت أنا وصيته قلت من فضلك تكفي مر على أهلي وشف أن كان يبون شي وإن ما لقيت أهلي في بيتي أنا اللي وصفته لك تلقى بيت عنه شوي في أسفل السوق هذا بيت أهلي تقلى أخواني قل لهم يسلم عليكم وأنه بخير وصحة وطيب ولاعندي خلاف ويسأل ويقول وشلون الأهل وعطني أخبارهم وعلومهم , قال : زين .
جاء المرسال ذا وبعض المرات المرسال يصير ما هوب حكيم يصير الله يهدينا وياه عجل أو غير مبالي المهم طقق عليهم كلهم واعطاهم الشي على عجله لأنه حريص على شغل الأمير اللي مروحينه له المهم طق على بيت جديع وإلا ما عنده إلا الغبار مغبر عند باب السوق عرف أنه مابه أحد راح لإهله وطق عليهم كيف الحال ؟ طيبين ؟جديع طيب ويسلم عليكم ها وش لون العلوم ؟ قال : أبد ترجع لمه ؟ قال : أيه , وتقول أمه علمه أن مرته أظنت وجابت وليد وأن الوليد هذاه عندنا بلشين به ندور من يرضعه قال : أمه وراء ما ترضعه ؟ قالت : قدر الله عليها وتوفت أثنا الوضع أنا الله قال : الله يجبر عزاكم , لمهم عرف الهرجه وأنه زوجته توفت وإن الوليد ذا بلشين به يبون يدورون له من يرضعه . رجع عليهم عاد هذا متى وصلهم يالله عقب ثلاثة أيام لان محلهم بعيد ما فيه خطوط مزفلته من أول تغاريز ورمال ومادري ويش المهم جاهم في الليل وهو يوم جاهم والاه منعفس ومغرز يجي له ثلاث أو اربع مرات ولا عاونه أحد ومتبهذل ومنغث وجو لمه في الليل يسألونه كل يمسكه مع جهه ها ويش صار على ذا ويش صار قال يالربع أبي اعلمكم أنت اهلك يسلمون عليك وأنت أهلك يقولون لك كذا وانت أمك مصخنه وذاك أخوك الصغير إنحاش عنهم له يومين يدورونه وإلا الأخبار كل اغلبها مهيب زينه قال جديع وأنا قال انت بعد زوجتك ما تت الله يغفر لها وير حمها وإلا يوم طقه بها العلم يومه يروح ما فيها الا العافيه , المهم يالربع يقول جديع ما نمت ذيك اليله الله لا يعيده لا هو ولا علمه ! ليته بس مخليه للنهار يقول هالك الليلة أن طالعت هالدله ذي تصورت قدامي المره وإن طالعت الفنجال هذا تصورتها قدامي وأن رحت يمين يسار وإلا كل ساعه أشوفها يالله غربله يالله يوم يقولي هالعلم في الليل – الحاصل يقول من جاء الصبح علموا طبعاَ الأمير وتأثروا كل الربع كل قال لي أحسن الله عزاك لكم إلى الان وأنا منعفس بين المصدق والمكذب ويقول جينا نفطر ما اسفهليت ألا حولنا جبال وظلعان يمين ويسار وكل ساعة اعدي لي في ظلع واروح في ظلع ويقول حس الأمير اللي أنا معه أني ما أجلس ولا يمسكني مكان قال جديع , قال نعم قال شف السيارة الثانية تبي تروح للماء أركب مع راعي الوايت الين تقدمك شوي ورح لهلك تأكد منهم وسلم عليهم وتطمن قال الله يجزاك خير ياطويل العمر, المهم وصل أهله عقب يومين وصلهم مسيان ويقول يوم وصلت هناك وجيت للبيت وقبلت على بيتي وافتحه وإلاه مغبر ويقول واروح لم غرفتي أنا وياها وإلا يوم كهت على ريحه الغرفه فيها ريحان وطيب وذا يقول أتذكر ريحتها يقول يوم طالعت وإلا هذي ثويباتها معلقه وغريضاتها منا والمواعين بعضها ما غسل ويقول وأنا انعفس ما عرفت اقعد بها البيت ابد أجي لأهلي وألا أمي تقول ابشر بالعوض إن شاء الله ما يكون إلا الخير والوليد ابشرك بخير يحاولون هم يطمنوني وأنا ماش يقول قعدت عندهم يومين الين تدهدهت الأمور ورجعت لمعزبي اللي أنا معه ويوم وصلتهم هاه , وشلونك ؟ قال : أن شاء الله طيبين يقول إلى هالحين إذا جو يفطرون والا يتغدون ما ارتاح بالي يقول ما ادم أني بالنهار وأنا مسفهل لكن لا جاء الليل الله يجيرك قال الحزن اشتد بيديك ( بليس الله يعيذنا منه يوسوس لك ) يقول رقيت إما على ظلع منا والا منا وقعدت فيه إلين الصبح ويوم جاء يوم حول الفجر وأنا اعدي في هذاك الرجم جبل جنبنا وأبطيت فيه يقول أثر الأمير فقدني وجاء لي هنا وأنا في رأس الجبل يقول يوم جيت للرجم هذا وإلا عنده قبر وهذا اللي حزني زيادة تذكر قبرها يوم شافه ذا القبر لانه يوم سأل عنها يوم يجيهم قالوا تراها توفت وتطلبك الحل وإن حنا قبرناها , في هالمقبره هذي شف قبرها إلا دخلت شفه ثاني قبر على يمناك يقول وفعلاَ رحت شفت القبر وشفت ترابه جديد ونصايبه جديده وعرفت أنه هذا هو يقول اقلب القبر وإلاه حصي مرصوص ما يفيدني القبر بشي رجعت يوم رجع عاد وعدا في هالجبل اللي هو فيه جاء عقب ما جاء معزبه وجاء عند الرجم وشاف القبر هذا ذكره وقال الابيات هذه :
يا رجـم عديتـك وعدابـي البيـن
والقلب فـي رأسـك تبيـح كنينـه
الله لا يسقـي مفالـيـك عامـيـن
ذكرتنـي راع الطبـوع الحسيـنـه
مرحوم ياللي جهزوا يـوم الاثنيـن
العصر من فـوق النعـش شايلينـه
رصوا على منبوز الارداف سافيـن
رصـوا عليـه اللبـن وموحدينـه
ياليت كفي حدر خـده عـن الطيـن
والكف الآخر فـوق صافـي جبينـه
وياليت يومي قبـل يومـه بيوميـن
ليت المرض مـن بيننـا قاسمينـه
لا ياحياة الشر عقب اريـش العيـن
لاواهنـي مـن شافنـا مقتفيـنـه
شربت أنا من صافي الغبن كاسيـن
هـذا معاليقـي وكـبـدي متيـنـه
ياونتـي ياشيـن فرقـا المحبـيـن
وياعين ياللي مـن فراقـه حزينـه
يا سهر عيني والمخاليـق ممسيـن
وياقلبـي اللـي مثـل دق المكينـه
قالوا حزين وعشرك اليـوم ثنتيـن
قلت اعذروني زين الاطبـاع ويـن
قالـوا تخيـر بالبنـي المزايـيـن
قلـت العـذارى غيرهـا منكرينـه
قالوا عجوز وقلت أنا وفالكم شيـن
الخمس والعشريـن قيمـه سنينـه
وجدي عليها وجد راعـي بعاريـن
ممس ( ن ) خلاوي والسرق حايفينه
هن رأس ماله وشلعوهن شياطيـن
واصبح على الجـره يفـرك يدينـه
أو وجدي من لحقوه طلابـة الديـن
صكـت عمـي القايلـه مطلبيـنـه
لحقوه عكفـان الشـوارب مغليـن
وتشا وحـوه بكـل شلفـاَ سنينـه
هذا وصلـوا عـد نبـت البساتيـن
عـلـى نـبـي كلـنـا تابعيـنـه
يوم قال القصيدة هذه ونزل ولاحظ الأمير قال هاه أنت راقي ذا الرجم كنك تونون وتومي بالسبحه وش عندك أكيد أنك قايل شي قال والله يا طويل العمر مثل ما تخبر الرجال اللي فاقد زوجته وهذا لابد أنه يقول واسمعه القصيدة قال ابشر بالعوض ويقول جزاه الله خير ما قصر وساعدني , وعقب ما دخلنا و اوفينا مده تزوجت لكن ماش إلى هالحين مالقيت عقبها حريم سنعات عقب هاك الاوله .
يقول عاد تزوجت لي وحدة واثر الوحده هذه لها عمه وتخيط ثياب وشارطين علي قالوا : ترى تروح لعمتها تخيط ثياب عندها وتقعد عند عمتها وتشتغل معها يقول قلت ما يخالف أن كانه الضحى وقت فراغ وذا بعد تروح توسع صدرها عند عمتها إلين اصير موجود المهم لا أجي للبيت إلا هي فيه وغداي زاهب وعشاي زاهب وكل شي قالوا ابد مالك إلا الخير يقول مره مرتين ثلاث كل ما جيت وإلا ما هي في البيت يامره وين أنتي ؟ قالت عند عمتي إنا الله يقول يوم جاء هاك اليوم ويجي قبلها الظهر ويقعد إلى العصر ما جت وهو يبي غداه يقول وإلا يوم جت طابخه وآيا عمتها غدا وجايبه معها شوي ويقول يوم طقت الباب قال هاه قالت جايه من عند عمتي قال على يسراك على يسراك ما عاد والله تدخلين البيت ( بلاك والله ما حبيتها مسيكينه ) كيف ؟ قال: ابد خلاص عودي يقول عاد ..
حذرى عن اللي لها عمـة
لو تنثـر العطـر بالجيبـي
دايم عسى مـا لهـا رمـة
تهرف كما ياهرف الذيبـي
ألا قلت علم ( ن) ماهي لمه
تقول أبـا انحـر معازيبـي
بارودي اللـي بهـا زمـه
حلالـه القـوم وتصيـبـي
وسلامتكم
....,.,.,.,.,.,.,.,.,.,.,.,.,.,.,.,.,.,.,.,.,.,.,. ,.,.,.,.,.,.,.,.,.,.,.,.,.,.,.,.,.,.,.,.,.,.,.,.,. ,.,.,.,.,.,.,.,.,.,.,.,.,.,.
وهذي القصه الرابعه
البدو واللي بالحضر نازلينا &&& كلن عطاه الله من هبت الريح
بداح العنقري كان من امراء ثرمداء ... وكان رجل تاجر ... وكانوا يجونه البدو كل سنه يشترون منه بالدين اغراضهم وحوائجهم وكان رجل آمين وخلوق وكريم وصاحب مروه وشهامه ... وكان يديّن اللي يشترون منه الي السنه اللي بعدها يجون يشترون منه ويعطونه فلوسه الاوله ....
وحدى السنين جاه احد اخوياه يشتري منه وكانت معه بنته مزيونه .... المهم ان بداح رحب بهم واكرمهم واشتروا منه ورجعوا لديارهم بالباديه .... فقرر بداح الا ان يتزوج بنت صاحبه ...
وفعلن عقب مامشوا منه وبعد كم يوم من مشيهم .. ويوم هقا انهم وصلو ديارهم شد على فرسه ولحقهم ... ايام وليالي لاوالله الا هو واصلن عندهم .... فرح خويه بالحيل وهلا به واكرمه ... وثاني يوم قال بداح لخويه انا جايك طالب ايد بنتك هيا ... فقال ابرك الساعات وارخص لي اخذ راي البنت ... فراح الابو ونشد بنته وبداح يسمع حيث ان صوتهم كان مسموع .. وقالها يابنتي بداح العنقري جاي يطلبك حليلتن له وش تقولين ؟؟ قالت البنت : هذا حضري .. خيال تصفيح مايصلح لي ولا أصلح له .... سمع بداح كلام البنت ... فجاء الابو مستحي وماتكلم .. قاله بداح ماله داعي الحيا والزواج قسمه ونصيب .. مير انت بيض الله وجهك وارخص لي هالليله ابي انام والصبح ابي امشي لاهلي ...
المهم جاء الليل وعجز لا ينام بداح من القهر من اللي سمعه انالبنت ماتشوفه شي وانه ماهو شجاع ولا به خير .. فتمنى بس لو يجي موقف يقدر يثبت به وجوده ........
المهم يوم اصبح الصبح مع الفجر .. يوم صاح الصياح .... الغزو الغزو .... اثاري قبيلة ,,,,,,, غازين وماخذين حلالهم .. فتفازعت القوم والحقوا الفضول وبداح قاعد ايتقهوى ماتحرك ابد (( لان الضيف مايلزمه شي )) فجته البنت هيا اللي كان يبيها تناظر له باحتقار وتقول حضري خيال نظره ..... حضري خيال نظره .... تعني انه بس مظهر ومحتقرته لانه مافزع مع القوم...........
المهم وهم يلحقون الفضول واتشابك السيوف ويعجزون اهل الحلال لا يفكون حلالهم وهم يرجعون حول الضحى منكسرين وخايبين ولا ردوا شي .... وبهكاللحظات والناس والحريم كله طالعه تناظر الحال فقام بداح يوم شاف ان معازيبه انكسروا وقدام الكل والبنت تشوفه وركب فرسه وخذا رمحه وطنب يم ,,,,, يبي يرد الحلال لحاله ..... الناس استغربت والبنت اندهشت ... وهو يلحق ,,,,,, وادخل بينهم واذبح واذبح والبخيت اللي نجا .. وهو يرجع بالحلال حروة العصر لحاله ... وكانت الناس تستقبله كله .... واول ما اقبل يم الديره ومعه الحلال اركضت عليه هيا وقامت تهلهل مثل انه تعتذر منه وقابله الزواج به .... فركز رمحه عندها وقال :
الله أحـد يامـا غزيـنـا وجيـنـا
وياماركبنـا حاميـات المشـاويـح
ويامـا علـى اكوارهـن اعتلينـا
وياما ركبناهن عصيـرن مراويـح
ويامـا تعاطـت بالهنـادي يديـنـا
وياما كسبنا من حـلال المصاليـح
وراك تزهـد يريـش العيـن فينـا
تقول خيال الحضر زين تصفيح ؟؟ !!
الطيـب ماهـو بـس للضاعنينـا
قسّم على كـل الوجيـه المفاليـح
البـدو واللـي بالحضـر نازليـنـا
كلن عطاه الله مـن هبـت الريـح
يوم انجمر رمحي خذيـت السنينـا
واودعت عنك الخيل صم(ن) مدابيح
هيـا عطينـا الحـق .. هياعطينـا
وان ماعطيتيـنـاه والله لا صـيـح
لاصيح صيحـت مـن غدالهجنينـا
والا خلوجـن ضيعـوه السواريـح
ياعـود ريحانـن بعـرض البطينـا
ومنين ماهب الهوا فاح لـه ريـح
يابو نهيد(ن) تقـل فنجـان صينـا
والا كما بيضـن للمشقـا ذوابيـح
لاخـوخ لا رمـان لاطلـع تيـنـا
ولا مشمش البصرة ولا هن تفافيـح
ويقولون عقب القصيده مشى وخلاها ماتزوجها فقامت هيا من زود القهر وحطت الرمح بصدرها وماتت قهر انها عييت عليه وهو عيا عليها ...
وسلامتكم
وهذي القصه الخامسة :.
.,.,.,.,.,.,.,,.,.,.,.,.,.,.,.,.,.,..,.,.,.,.,.,., .,.,.,.,.,.,.,.,.,.,.,.,.,.,.,,.,.,.,..,.......... ....,.,.,.,.,.,.,.,.,,,.
قصة وقصيدة الشاعر أبو زويد السنجاري
هذه قصة رواها الشاعر رضا طارف الشمري وهي من قصص الشاعر الشهير خلف أبو زويد السنجاري من قبيلة شمر ويعد من فحول الشعراء الشعبيين، ويعتبر من أحسن من يصوغ القصيدة، بالحكمة وجزالة اللفظ. وأكثر أشعاره في وصف الجيش، ومدح الشيوخ، وإذا تتبعت أشعاره تجد غزله قليلاً، ولكبر قيمة الشعر والشاعر تجدهم يتتبعون انتاجه، ويتسابقون إلى حفظ القصيدة متى ما قالها ويلاحقون الشاعر بالمجالس، لأن الشعر في ذلك الوقت هو صحافتهم وإذاعتهم، فما كان مذموماً جنبوه، وما كان مفيداً ديناً ودنيا أخذوه.
أبو زويد هذا كان يوماً من الأيام يسقي "حلاله" من خَبراء عندهم فيها ماء، ومن الصدفة أنه كان على تلك الخبراء مجموعة بنات يأخذن ماء وكان من ضمنهن فتاة اسمها "خزنة الفضيل" عليها جمال باهر، وقالن البنات هذا الشاعر الذي كل قصائده في الجيش نريد أن نحاول أن نجعله يتغزل، فعارضته المذكورة لما وهبها الله من الجمال، فابتسمت له وداعبته وقالت "يا بو زويد " قال: نعم "قالت" يقولون عنك إنك ما تقصد بالنساء فلماذا؟ ويقولون الناس أيضاً قلبه ميت، فكيف يكون هناك من يرى مثل هذا الجمال ولا تتحرك شاعريته؟ "فبهت، ولكن بساعته تحركت قريحته بالأبيات التالية:
القلب يبرم بالهواجيـس ويديـر
من جادل جتنا طوارف اطروشـه
قام الفهيم وصخر القيل تصخيـر
قرايض مـا ولفوهـا الدحوشـه
والله يالولا باقي الناس لا اشيـر
اخاف من نـاس تنثـر اقفوشـه
لااقول عجـوا بالبنـي الغناديـر
وعزي لمن له عشقه ما يحوشه
مصور منبـوز الأرداف تصويـر
تصوير وشحا نايشتها اعطوشـه
لا بالقصار ولا الطوال الطناطيـر
ولا بالغلاظ ولا دقـاق نشوشـه
خده من الموت الحمر به دواويـر
كن الصعيوي دورجن في نقوشه
خده عفر واصفر كما ذوبة الكيـر
والخشم مصقول بلمـات هوشـه
والردف شط امتيه له على ضيـر
امه جضور وراعية مـا ينوشـه
وإلا يشـادي نابيـات الحماريـر
عقب الهبوب ونايشتها رشوشـه
وثنيـوات التـرف غـر مغاتيـر
من شافها يسقم على اردا معوشه
والعين عين اللي بروس العناقير
نجل سواد عيونها مع ارموشـه
وسلامتكم
وهذا المثل
أول من قال هذا المثل والله العالم هو الشاعر الفحل (سرور بن عودة الاطرش)
شاعر فحل ولد عام1200هـ وتوفي عام 1280هـ تقريبا يسكن في قصر له يسمى
مشرف../ شمال وادي الرمة يبعد عن مدينة الرس 20كم تقريبا اشتهر سرور الاطرش
بجودة الشعر وبقوة البصر ويضرب فيه المثل بقوة بصره زمان مستلقيا في الصحراء
بجواره اخته (سراء)فقال هل ترين الغرانيق وقصده اختبارها فرفعت رأسها ولم ترى
شيئا فقالت اين هي من (بنات نعش).!!؟ وكانت ترى النجوم!! فضحك وعرف انها رأت
ما رأى وهي النجوم ويروى له من القصص الكثير الكثير اما قصة المثل..
(( (( الشيب مابه عيب ))))
فيقال بأن أحدى النساء تمنت أن ترى سرور لشهرته فقالت لصاحب دكان اريدك
أن تخبرني عندما يحضر اليك الشاعر سرور الاطرش فلما حضر عنده في احد
الايام أرسل التاجر اليها ولده.وقال قل لفلانه بأن حاجتها عندنا فلما اخبرها الولد
جاءت الى المحل وقد ظهرت علامات الشيب على لشاعر سرور . فلما رأته قالت
انت سرور قال نعم قالت ماظنيتك شائبا قال ( الشيب مابه عيب)..
ثم ارتجل الابيات التالية:
يازين شفني لا توصي وصايا
مادام كلٌ حاضر قل ونا أقـول
عذربت شيبي ياجميل الحلايـا
لابد مايبداك مع كـل مجـدول
يبدأ بشقرٍ مثل عصم الروايـا
عليه من شغل اليمن تل وتلول
الى آخر الابيات التى قد لايجيزها النشر بعد ذلك اعتذرت بأنها لا تقصد تقليل
قيمة كبار السن وما أكثر مايحصل على شاكلة هذه القصة..
وسلامكتم
وهذه القصه السادسه:/.
.,,.,.,.,.,.,.,..,..,..,..,..,..,..,..,..,..,..,.. ,.,.,..,.,.,..,.,.,.,.,.,.,..,,..,.,.,.,.,..,..,.. ,..,.,.,.,.,.,.,..,..,.,.,.,.,
قصة اعتقال راكان بن حثلين
كان الشيخ راكان بن حثلين شيخ العجمان انذاك قد أقضع مضاجع الاتراك وبلبل افكارهم ولم يهدأ لهم بال حتى قبضوا عليه وأخذوه مخفوراً الى بلادهم وسجنوه فبداية القصه هي أن لراكان مكافأه يستلمها من ابو عوده وكيل حكومة الاتراك في الاحساء ، لان العجمان يحمون منطقة الاحساء من القبايل ........هذا في الصيف .
وفي الشتاء يرحلون طلباً لربيع ، وعندما استقرو العجمان في البر ركب راكان مع ستة من رجاله وذهبوا إلى الاحساء ونزلوا عند ابن عوده ليوكلوه على استلام مكافأتهم، وكانت الحكومة التركيه طلبت من ابن عوده ان يخبرها بوصول راكان ، فلما اعلمها ذلك الجبان ارسلت له قوة أسرته فأرسلته الى استانبول وفي اثناء مسيره بمنطقة الاحساء مر ببعض البنات اللي يحطبن من بنات العجمان وال مرة وقد عرفنه فقال راكان موصياً لهن:
سلام عليكن كلكن ياحطاطيب
الله يساعد كلنا فـي نويـه
بنات لام لاتجن القصاصيـب
وباليسري لاتدخلن في حويه
اما جماعته الستة فسم ارسلوه الى البحرين وقسم ارسلوه الى ايران.
فلما وصل راكان الى تركيا وضعوه في مكان بعيد عن المدينه ووضعو
عنده رجلاً يصنع له القهوة وبعض الخدم لخدمته ومن بينهم السجان
حمزة الذي طلب من راكان ان يحدثه عن رحلته عن طريق البحر وكم
استغرقت الرحله من مده فقال راكان :
حمزة مشينـا مـن ديـار المحبيـن
الله يرجعـنـا عليـهـم سلـومـي
مشوا بنا العسكـر لـدار السلاطيـن
في مركـب جـزواه تـرك ورومـي
عشرين ليـل يمـة الغـرب مقفيـن
ماحن نشوف إلا السمـا والنجومـي
والنوم يامشكاي مالاج فـي العيـن
والقلـب ياحمـزة تزايـد همومـي
مـن الخداعـة واحتيـال الملاعيـن
هيهات لـو انـي عرفـت العلومـي
هيا اركبو من عندنـا فـوق ثنتيـن
وخلوا نجايبكـم مـع الـدو تومـي
لازوعن بالوصـف مثـل القطاتيـن
تبغى الشـراب ولايعنهـا السمومـي
اليا اصبحن كنهن جريـد البساتيـن
نحال مـن كثـر الحفـا وارثومـي
تلفي على ربـع عساهـم عزيزيـن
اهـل الشجاعـه والكرموالعزومـي
ربعي ضنا مرزوق بالعسـر والليـن
لطامـةٍ للـي عليـهـم يـزومـي
عجمـان لا رد الـبـرا للمعـاديـن
حريبهـم مـن همهـم ماينـومـي
يوم الخيانة ليت هـم لـي قريبيـن
من فوق زلبـات تبـوج الحزومـي
وليا تعلـوا فـوق مثـل الشياهيـن
مركاظهم يشبـع وحـوش تحومـي
نـوب سلاطيـن ونـوب شياطيـن
وكم شيـخ قـومٍ توهـم مايقومـي
يالله ياقـابـل ســوال المصلـيـن
يا اللي له التقدير فـي كـل يومـي
انـك تثبتنـا علـى الحـق والديـن
وانـك تـروف بحالنـا يارحـومـي
وعسى مقابيـل الليالـي لنـا زيـن
مـن عقـب مانوسـن العلـومـي
وصلوا على اللي وضح الزين والشين
وشيد منار الدين واعلـى الرسومـي
وسلامتكم
وهذا المثل الثاني :,
اذا بـــجد تعــزنيــ حيــلــ
دخيلــك لا تخــليـــهـــــا
واذا هنــتــ انا عنـــدكــ
خــــلاصـ بكيـــفكـ ارميــها
بيــديكــ ادفنـــها بالتربـــهــ
وخـــلــ المـــوتــ يسليــــــهـــا
--------------------------------------------------------------------------------
آخر تعديل بواسطة غريب الدار ، 18-06-2006 الساعة 12:19 PM. السبب: للتنسيق
كل الفخر رساوية
عرض الملف الشخصي الخاص بالعضو
إرسال رسالة خاصة إلى كل الفخر رساوية
إيجاد المزيد من المشاركات لـ كل الفخر رساوية
14-06-2006, 02:53 PM رقم المشاركة : 11
غريب الدار
مشرف المنتدى العام
عضو مجلس الإدارة
الملف الشخصي
الحالـــة :
قصّة مثل (هـذا بلى أبـوك ياعـقـاب) ....
--------------------------------------------------------------------------------
أول من قال هذا المثل هو الشاعر والفارس أمير البلقاء (نمر بن عدوان)
والذ تسبب في وفاة زوجته (وضحاء) عن طريق الخطأ.والقصة معروفه
لكنه خزن بعدها حزناً شديداً جسد هذا الحزن في مراثيه لتلك الزوجة
ويقال انه تزوج تسعين بنـتاً ممن تسمى وضحاء لعله يجد صفاتها
في إحداهن ..وأن كان العدد فيه بعض المبالغة إلا ان القصة
صحيحة وكان أكبر ابنائه عقاب وأصغرهم سلطان حيث
يقول نمر.....,
ياجديع بن قبلان يامفني الكـوم
فقد الحبيب امصيبتي ياابن قبلان
ابكيه أنا وعقاب يوم بثـر يـوم
وجار الزمان وباغت اليتم سلطان
وبينما نمر وابنه عقاب يجلسان ....تحت.. ظل.. شجرة في ......الصحراء رأى
عقاب أثار الحزن على وجه أبيه ....فأراد أن .....يخفف عنه..... أو يداعبه
فقال ياأبي جميع النساء. اللاتي تزوجتهن .......أحسن...... وأجمل من
أمي الا تعلم أن أمي يوجد بها.. عيب..... لم يوجد..... بنسائك اللاتي
تزوجت.فقال نمر....... وماهو هذا العيب؟ ...وكأنه يستهزئ بأبنه
فقال عقاب أمي عندما تستلقي .......على الارض في الصحراء
وأنا ألعب عندما كنت..... أدحرج الحنظل (الشري) فتمر من
تحت ظهرها فقال نمر .....0(هذا بلى أبوك ياعقاب)فصارت
مثلاً..وهذه الصفة لا توجد في كل امرأة وهي من صفات
جمال المرأة وتفسير ذلك قول الشاعر (عبدالله العلي الحرير)
أحد شعراء الرس رحمه الله
كن عوده يوم يمشي مطرق الريحاني
بس كتف وردف والمثناة تطوي ثوبه
اما قصيدة نمر بن عدوان في رثاء زوجته :
البارحـه يـوم الخـلايـق نيـامـا
بيحت من كثـر البكـا كـل مكنـون
قمت اتوجد وانثـر المـاء علـى مـا
من موق عين دمعها كـان مخـزون
ولـي ونـة مـن سمعهـا ماينامـا
كني صويب بيـن الاضـلاع مطعـون
والا كمـا ونـة كسـيـر السـلامـا
خلـوه ربعـه للمعـاديـن مـديـون
فـي ساعـة قـل الرجـا والمحامـا
في ما يطالع يومهـم عنـه يقفـون
والا كمـا ونـة راعبـيـة حمـامـا
غـاد ذكرهـا والقوانيـص يرمـون
تسمـع لهـا بيـن الجرايـد حطامـا
من نوحها تدعـي المواليـف يبكـون
والا خـلـوج سايـبـه للهيـمــا
على حوار ضايع في ضحـى الكـون
والاحــوار نشقـولـه شـمـامـا
وهي تطالع يوم جروه بعيون=يردون مثلهوالظوامي سياما
ترزمـوا معهـا وقامـوا يحـنـون
والا رضـيـع جـرعـوه الفطـامـا
توفـت امـه قبـل اربعينـه يتمـون
عليـك ياشـارب لكـاس الحمـامـا
صـرف بتقديـر مـن الله مــاذون
جاه القضا من بعـد شهـر الصيامـا
صافي الجبين بثانـي العيـد مدفـون
كسوه من بيض الخرق ثـوب خامـا
وقاموا عليه مـن الترايـب يهلـون
راحوا بهـا حـروة صـلاة الامامـا
عند الدفـن قامـوا لهـا الله يدعـون
برضـاه والجنـه وحسـن الختـامـا
ودموع عينـي فـوق خـدي يهلـون
حطـوه فـي قبـر غطـاه الهـدامـا
في مهمة من عرب المـات مسكـون
ياحفـرة يسقـي ثــراك الغمـامـا
مزن من الرحمـه عليهـا يصبـون
جعـل البختـري والنفـل والخزامـا
ينبت على قبـر بـه العـذب مدفـون
مرحـوم ياللـي مامشـى بالملامـا
جيـران بيتـه راح مامنـه يشكـون
ياوسع عذري وان هجـرت المنامـا
ورافقت من عقب العقل كـل مجنـون
اخـذت انـا وايـاه سبعـة اعوامـا
مع مثلهن فـي كيـف مالهـا لـون
والله كنـه ياعـرب صـرف عـامـا
ياعونة الله صـرف الايـام وشلـون
واكبر همومـي مـن بـزور يتامـا
وان شفتهم قـدام وجهـي يصيحـون
وان قلـت لا تبكـون قالـوا علامـا
نبكـي ويبكـي مثلنـا كـل محـزون
لا قلت وش تبكـون ؟قالـوا يتامـت
قلـت اليتيـم ايـاي وانتـم تسجـون
قمـت اتشكـا عنـد ربـع اعـدامـا
وجوني على فرقـا خليلـي يعـزون
قالـوا تـزوج وانـس لامـه بلامـا
ترى العذارى عـن بعضهـم يسلـون
قلـت انهـا لـي وفقـت بالـولامـا
ولـو جمعتـم نصفهـن مايـسـدون
مـا ظنتـي تلقـون مثلـه حـرامـا
ايضا ولا فيهن علـى السـر مامـون
واخاف انـا مـن غاديـات الذمامـا
اللي على ضيم الدهـر مـا يتاقـون
او خبلـة مـا عقلـهـا بالتمـامـا
تضحك وهي تلدغ على الكبد بالهـون
تـوذي عيالـي بالنهـر والكـلامـا
وانا تجرعنـي مـن المـر بصحـون
والله لــولا هالصـغـار اليتـامـا
وخايف عليهم من الدجـه يضيعـون
لقـول كـل البيـض عقبـه حرامـا
واصبر كما يصبر على الحبس مسجون
عليـه منـي كـل يــوم سـلامـا
عليـه منـي كـل يــوم سـلامـا
عدة حجيج البيـت واللـي يطوفـون
وصلوا علـى سيـد جميـع الانامـا
على النبي ياللـي حضرتـوا تصلـون
وسلامتكم
تقبلوا خالص تحياتي
أخوكم/ خالد آل هويدي