ديب .. ديب .. ديب
كانت الضربات تهز الحجرة بقوة وكأن البيت سينهد على رؤوس اصحابه .. ذلك عندما سمعت صوت ابى يقترب علي من الحجرة المجاورة وهو يقول " الحقي ياتفيده .. ابنك المجنون باين عليه هيعملها ويفتح اوضته على اوضيتنا "
انفتح باب الحجرة فجأة ودخل ابى مسرعا وهو يصرخ :-
بتعمل ايه يامجنون يابن ال ( كذا ) ورغم اعتراضى الشديد على وصفة لى بالمجنون مش مهم التانيه ..لكنه بالفعل..كان عنده حق .. فلقد دخل على وانا نازل بدماغى رزع فى الحيطه والدم مغرقها ومغرق وشي معها .. وانا عمال اصرخ وأقول :
-ياأنا ياأنتى ..ياأنا ياأنتى .. هتشتغلي يعنى هتشتغلي ..والله منا عاتقك الا لما تطلعى قماش .
-قفز ابى فوقى بسرعة وهو يكتفنى بكل قوته ويقول : اهدا .. اهدا يامجنون .. اهدا بقولك هتموت نفسك
- وانا اصرخ وأقول : سيبنى يابابا .. سيبنى بقولك .. لازم اربيها .. لازم اخليها تشتغل غصب عنها .
لكنه لم يتركنى أفلت من يديه بل نزل على صفعا وركلا وهو يصرخ :- اهدا بقى يابن ( كذا ..)هتبوظ الحيطه الله يخرب بيتك .
وبعد ربع ساعة أو يزيد من النحيب والبكاء والتهدئه .. وانا أعيط .. بدأت اهدأ من روعي وأفضفض مع أبويا
-خير يابنى .. فى أيه؟؟..هى كانت عملتلك ايه لكل ده؟؟
-مجنزرة يابابا .. مجنزرة وعاملة زي الجزمة القديمة ومش راضيه تشتغل
-طب وأيه يعنى مجنزرة .. ولا مبعجرة .. وانته عايز منها ايه دلوقتى .. ده حتى لسه بدري على الامتحانات
-"ويوميات جامعاوي" يابابا .."يوميات جامعاوي"اللى بقالها اكتر من تلت او اربع مرات تخنق وتجيب اللى فى البطن وكل ما أحاول اجيب فكرة جديدة الاقى دماغى محجرة زي الطوبه
-يابنى متكبرش الامور .. ايه يعنى لما تكتبلك كام مقال خنقة ؟؟!!
ايه يعنى!!..يابابا انته مش عارف حاجة .. ده انا بقيت مسخة الموقع .. ايشى شتيمة وايش تأليس .. دى وصلت ان الواد خالد عمر بيقولى حكهرب اوكرة الباب بتاع "يوميات جمعاوي" عشان لو فتحته تانى تموت ونرتاح منك .
-بابا إيه اللى يكهربه ده؟؟.. ده أنا اكهربلك الموقع باب باب..واكهربه هو وعيلته معاهم
-يابا المشكلة مش فى خالد عمر وبس .. ده كل الناس بتقول كده .. حتى اللى بيخشوا يعلقوا ونسيوا كل الحاجات الجميلة اللى كتبتها قبل كده .. نسيوا كل الضحك اللى ضحكتوهلهم .. وكل ده عشان ايه عشان كام مقال طلعوا ولا نزلوا
-طب يابنى ماتورينى المقالات دى يمكن يكونوا ظلمينك ولا حاجة
- والله عندك حق يابابا .. اقرا انته واقولى رايك ( اديته يقرا المقال السابق "سفن رول لاكل الفول" )
وبعد ما انتهى القراءة .. ابتلع ريقه بصعوبة ثم قال " ولايهمك يابنى ما تحوطش فى دماغك ..ياربى مش عارف الصداع اللى جالى مرة واحده ده .. قوم ناولنى دوا الضغط
-مش وقته دلوقتى يابابا .. شوف المقال ده طيب ( اديته يادنيا ياقطاري )
-انهاه بصعوبه بالغة .. وقد تعالت انفاسة فى صورة مفزعة وقعد يصرخ " خلاص بقى الله يخرب بيتك .. ما اللى حصل حصل .. اجري هاتلى دوا القلب بسرعة
-حاضر بس شوف الاول المقال ده اخر حاجة .. واديته "الاتحاد سيد البلد " وياريتنى ماديتهولوه .. فلقد بدء يترنح فى الحجرة .. ثم سقط من طوله ممددا على الارض واحذ يتكلم فى صعوبه بالغة :
"اوعى امك تقرأ الحاجات دى .. لازم حد يعيش عشان يربي العيال .. اخواتك الصغيرين ملهمش ذنب"
ثم نظر الى نظرة يملؤها اللوم والغضب وقال .. روح منك لله .. ثم شخص ببصره الى السماء .. و..
ابوييييييييييييييييييييييييييييييا
0(وهكذا .. رحل فى هدوء بعد ان أطمئن ان ابنه الاكبر قد صار اشهر كاتب كوميدى فى مصر بس لسه الناس مفهمتوش ؟؟؟!!!)
